مقالات عامة

10 أسباب مهمة للعمل في مجال المبيعات

مش عارف ليه انتشرت في الفترة الأخيرة فكرة سيئة عن وظيفة المبيعات، لدرجة أنها وصلت لابتعاد الشباب والخريجين عن المجال ده أو حتى التفكير فيه كمهنة مربحة، رغم أنه على مر السنين إتضح إن الشغل في المبيعات مش مجرد وظيفة بتشتغلها وتقبض منها مرتب أخر الشهر وخلاص، لأ .. المبيعات قصة تانية خالص ولو عايز تعرف أهمية المبيعات بص للنماذج الناجحة اللي في بدايتهم اشتغلوا في المبيعات لشركاتهم أو لشركات تانية، عندك مثلاً ماجد الفطيم اللي بدأ ببيع العربيات المستوردة، عندك توماس أديسون مخترع اللمبة اللي بدأ ببيع الخضار للجيران، فيه كمان راي كروك مؤسس ماكدونالدز اللي بداء ببيع ماكينات الميلك شيك عندك الكولنيل ساندرز اللي في بداية حياته كان بيبيع بوليصات تأمين، وغيرهم كتير من رجال الأعمال العرب والأجانب اللي اشتغلوا في المبيعات في بداية حياتهم قبل ما يبقوا رواد أعمال.

وتعالى نشوف دلوقتي أكثر عشر أسباب ممكن تخليك تشتغل في المبيعات :
1. تكوين علاقات قوية: شغل المبيعات بيخليك تكوّن شبكة علاقات قوية في مجالات مختلفة كتير، متنوعة ما بين مديرين تنفيذيين وأصحاب شركات ومديرين مشتريات ومديرين تسويق، وطبعاً المعارف دي هتبقى كلها مفيدة ليك في حياتك في البيزنس على المدى الطويل.

2. التجديد: وظيفة المبيعات عمرها ما كانت مملة وده لأنك من خلالها هتتواصل مع قطاعات كتير غير أن كل يوم بيكون مختلف شوية عن اليوم اللي قبلوا.

3. الإستقرار والأمن الوظيفي: الشركات دئما ما تحتاج قسم المبيعات حتى في أوقات أزمات الشركات وتقليل المصاريف هتلاقي أن الشركات بتزود الإستثمار في قسم المبيعات وبتقلل الإستثمار في أقسام تانية، لأن المبيعات هي اللي هتنقذ الشركات من الإفلاس.

4. مهارة تطوير منتجات جديدة: موظف المبيعات بيكون عنده مهارة تطوير وإبتكار المنتجات لأنه بيساعد على توفير ثروة من المعلومات عن إحتياجات العميل في المنتج اللي بدوره هيساعد على تصميم منتجات جديدة أو تطوير منتجات حالية.

5. حل المشاكل: نظراً لأن موظف المبيعات دوره بيبقى أنه يحدد احتياجات العميل والمشاكل اللي بتواجهه ويحلها، فده بالتالي هيديله مهارة حل المشاكل اللي بتعتبر من المهارات المهمة في أداء أي عمل.

6. الإهتمام بالمظهر: من أكثر الحاجات اللي بتميز موظف البيع الشاطر هو إهتمامه بمظهره ولبسه ولو عايز تضايق موظف مبيعات بجد دوسله على الجزمة وشوف هيعمل إيه، يعني من الآخر كده ” الشياكة ” من العناصر الرئيسية في وظيفة المبيعات.

7. العائد المادي: ميزة الشغل في المبيعات هي أن كل ما تشتغل أكثر كل ما تلاقي عائد مادي أعلى، ولو شغال مبيعات في شركة محترمة فبيبقى فيه عمولات وأرباح سنوية وحوافز ده غير الزيادات السنوية.

8. الإصرار: لو اشتغلت في المبيعات هتلاقي أنك مش بس بتثبت للي حواليك إنك ناجح، لأ بتبقى كمان عايز إنك تثبت لنفسك إنك قادر على تحقيق أهدافك، فهتلاقي ديماً إن العميل اللي هيقولك لأ هو حافز ليك عشان توصل للعميل اللي هيقولك موافق.

9. طريقة التتعامل مع شخصيات مختلفة: في المبيعات هتقابل كل أنواع البشر.. هتقابل التنك والذكي والغبي والمتواضع واللي بيهزر والجد اللي مبيضحكش، فهتتعرض لأشكال كتير من البني أدمين اللي بدوره هيساعدك على إنك تعرف إزاي تتأقلم مع شخصية اللي قدامك مهما كانت.

10. فرص التنمية كثير: في مجموعات ضخمة من المصادر المختلفة من ورش عمل وكتب وبرامج تدريبية اللي تقدر من خلالها إنك تتطور من مهارتك في المبيعات وتتعلم منها باستمرار.

اظهر المزيد

أحمد الدراوى

صحفى ومدون مصري .. أهتم بمجال التقنية والتطبيقات واعشق فنون الكتابة والتحرير الصحافي .. ومنغمس فى مجال البحث العلمي والأكاديمي .. أميل لمعرفة كل جديد حول فنون التصميم والجرافيك المختلفة

شارك معنا برأيك فى هذه المقالة

زر الذهاب إلى الأعلى
error: Content is protected !!
%d مدونون معجبون بهذه: